حقوق ضايعة

     شباب الثورة، شباب مصر؛ الناس اللي قامت عشان ترجع حقوقها الي ضايعه ونجحت في ده (أو في الطريق للنجاح في ده) ..
عاملين ايه ،خدتوا حقوقكم ؟؟ مبروك عليكم وعلينا يا رجالة مصر يا رافعين راسها ..

سامع شخصية لذيذة (عارفة نفسها كويس) بتقول إيه لزمتها الدخلة دي ،وطالما إحنا خدنا حقوقنا ،يبقى ايه العنوان اللي انت كاتبه ده وبتقول فيه حقوق ضايعة ؟؟
الحقيقة إن الحقوق اللي عاوز اتكلم عنها مش ضايعة بس، ده في كتير بينكروها ، يعني مش معتبرينها حقوق اساسا
بل بيعتبروا ان لو اصحاب الحقوق دي خدوها يبقى كده اعتدوا وتجرأوا وطالبوا بحق مش حقهم ..

وأنا ابتديت بالدخلة دي لسبب، إني أبين قد إيه الحق ده شيئ مقدس ..
انا طول عمري ببغض المعتدي، لإنه ادى لنفسه الحق انه يعتدي على حق غيره ،، وانا ماكرهش في حياتي قد الجور والظلم ..
وبما إن دينا الحنيف "يا متدينيين" من أولى أولوياته إرساء مبادئ العداله، فياريت مناخدش حق حد ...

برده مش واضح انا عاوز اتكلم عن إيه ، وعمال ألف وادور كتير من غير ما اقول ايه هي الحقوق دي ، ومين الظالم ومين المظلوم ؟؟!

وش كده انا اقصد حقوق الأقباط ،،
اه حقوق الأقباط ضايعة ، بل في ناس بتنكر كتير منها
ايوه الأقباط مظلومين في مصر من الثقافة الشعبية قبل القانون
ايوه الأقباط قعدوا كتير ساكتين على حقوقهم لدرجة اننا اعتبرناها معدومة

الحقيقة انا مش هتكلم على الإعتدائات الإرهابية، لإن الكل بينكرها ولإني اكاد اجزم إنها بترتيب من جهاز أمن الدولة السابق
ولا هتكلم على اللي بيسقطوا الأقباط في كلية الطب قسم النسا (عشان ممنوع الأقباط يبقوا دكاترة نسا)
ولا هتكلم على جهل الكتير اللي بيظهر في تعاملهم مع الأقباط ،

انا هتكلم عن حق واحد بس ممكن الكل يتفق على إنكاره
حق تولي منصب رئاسة الجمهورية

أول كلمة في الجملة دي هي "حق"
تقدر تقولي إيه القوة اللي على وجه الأرض اللي تديك الحق انك تسلب إنسان حقه ؟؟
هل هو أمر سماوي إن القبطي يُسلب حقه ؟
حاش لله ان ربنا يأمر بسلب حق بشر
ولا انتوا اساسا مش معتبرينه حق ؟؟
دي للأسف الثقافة العامة عند كتير من المصريين،
إن القبطي ليس له الحق أن يكون رئيس للجمهورية .

وبينقسم المعارضين للموضوع ده ل 5 أصناف بشرية مختلفة ،،
صنف  زي عم الشيخ حسن "عارف نفسه برده"
الناس الي زي عم حسن دول بيلبسوا طقية الشيخ، ويعملك فيها مفتي عصره ويبتدي يأصل المسألة من الناحية الشرعية
فمثلا يقول : " اصل لا يجوز "تولي" غير المسلم لأمر المسلم، وإنما وليكم الله ورسوله والذين امنوا بس!!"
ده الكلام اللي بنسمعه من عم حسن ومن غيره كتير
بس يا سيد يا محترم منك له، اولا، إيه اللي جاب تولي الأمر ل"عقيدة الولاء والبراء"، دي حاجة ..
الحاجة التانية،
انت فاكر رئيس الجمهورية ده بيبقى إمبراطور أو خليفه ؟؟
يظهر ان كلمة "خلافة" علقت في ودانكم ونسيتم يعني ايه دولة مدنية !!
دولة مدنية يعني الحكم فيها للدستور اللي ارتضاه الشعب، يعني رئيس الجمهورية ده منصب حكومي، يعني اللي "بيتحكم" هو الدستور اللي أقره الشعب مش رئيس الجمهورية ..


أما النوع التاني فهو حبة البشر اللذيذ اللي بيعمل فيها فهلوي كده ويبتدي يتفذلك
مش بيتكلم في الشرع، هو بيبتدي يقارنلك مصر بدول الغرب "الكافر" اللي بتمنع تولي المسلم للمناصب دي .
أولا طالما هو غرب "كافر" بتقلده ليه ؟؟
ثانيا هل انت مش شايف إن في منع المسلمين من تولي المناصب دي ظلم ليهم ؟ (مع إن معظم المسلمين هناك بيبقوا مهاجرين من دول إسلامية أساسا)،
إشمعنى هنا مش ظلم ليهم، مع إن دول ناس عايشيين في بلدهم ، لا هاجروا ولا اكتسبوا جنسية ثانوية ولا حاجة !!

النوع التالت " عالم الجغرافيا"

ده بيرجع المسألة لجغرافية السكان " أصل الأغلبية مسلمة"  " أصل هما أقلية ولازم يحترموا ده" "لازم علاقتنا بيهم تبقى علاقة (الأخ) الأكبر بالأخ الأصغر" .
ارد على دول بسؤال ،، إيــه ؟؟؟
إيه علاقة إن الأغلبية مسلمة في إن منصب حكومي يحظر على غير المسلمين ؟؟
وإيه معنى أخ أكبر وأخ أصغر (الكلمة دي بسمعها كتير وبستفزني جدا)، معناها انك ليك حقوق اكتر منه مثلا ؟؟
ثم إني اعرف ان الأخ الأكبر دايما هو الي بياخد باله من الأخ الأصغر وبيجيبله حقوقه ،،
وعموما انا أرفض هذا التشبيه الطفولي بشده ،،

رابع نوع ده اللي بيريح دماغه ويقولك "ما تتعبش نفسك ، حتى لو رشح نفسه الشعب مش هينتخبه "
عشان مسيحي ؟؟
طب هو الدين معيار لتولي المناصب الحكومية ؟؟
ولا انت بتحب تريحها وخلاص، دماغك يعني ؟؟

خامس نوع هو القلوق
وده عنده وسواس إن غير المسلم هيجي ويغير معالم البلد
هيقضي عالحجاب
هيرخص الدعارة
هيخلي الشعب ماشي بسكيني ومايكرو جيب والناس هتبقى ماشيه تسكر في الشوارع
والأخطر من كده
هيلغي المادة التانية !!!!!!
والصنف ده بقوله
بلاش تخاف كده واسترجل واشرب بيريل ..

اضيف حاجة قبل ما امشي عشان عندي جامعة، فكر لو انت اللي اتظلمت، هيبقى إحساسك إيه ؟؟؟
نشوفكم في خناقة تانية ،،